أوبريت.. قصة شعب | المدى |

أوبريت.. قصة شعب

عمل فني شبابي يلخص الفساد بالبلاد

انتشر على مواقع التواصل الاجتماعي أوبريت وطني أعدته مجموعة شبابية باسم ‘قصة شعب’ يلخص قضايا الفساد التي مرت بها البلاد على مر السنين، واستعان الشباب في الأوبريت بألحان غنائية وطنية وشعبية تراثية، ولكنهم استبدلوا الكلمات كي تحاكي واقعنا، وتقول كلمات الأوبريت:

اخدعونا وعيّشونا في وهم ..
قالوا انتو خير امه بالامم ..
والمواطن غارق فبحر النعم ..
نايمين وماكلين وشاربين ..

قالوا الدستور هو حصن البلاد ..
يكفل الاراء وحقوق البلاد ..
والقيادة همها دحر الفساد ..
هكذا طبع القيادة من سنين ..

والصحيح اللي ذكرنا مو صحيح ..
والبلد متدهور ومنهم يصيح ..
والقياده چذبها چذبٍ صريح ..

اسمعونا وافهموا يا سامعين ..
بنحچي لكم قصه لها خمسة سنين ..
تجسدت فيها معاني البطولة ..
يوم اقلبوا بالدار كل الموازين ..

وساد الفساد وكلهم صفقوا له ..
صاحوا شباب الدار وسط الميادين ..
ارحل و لازم تفهم اللي تقوله ..
سمعونا شصار شجرى ..
مجلسنا صار طرطره ..
وبجيب السلطة اشكره ..
والفاسد الفاسد الفاسد الكل قدّره ..
والديره ترجع لي ورى ..

احنا احنا نرفض .. احنا نرفض ..
الفساد اللي سرى بكل المدينة ..
والقيادة اللي انهبتها ..
تحت رايتهم غدينا غدينا غدينا ..
وما رضيتا تضيع ديرتنا وبالعزه مشينا ..

ولما الشعب واجههم .. واجههم بسلمية ..
قالوا مو على كيفك .. تطلع عاللي نقوله ..
بس اسمع وطيع وخاف .. والسلطة مسؤولة

قاموا يقمعون الناس .. والتعبير بالكلمة ..
حتى بيوت خلق الله .. ما خلوا لها حرمه ..
قال الشعب شالحيله .. شنهو الحل شنسوي ..
قالوا روحو المجلس .. وخلو صوته يدوّي ..

رحنا للمجلس وشفنا
للاسف بس اكتشفنا
شي غير اللي عرفنا
كل عضو چيكه بيمينه
واللي ماباعو الضماير
ومارضو في هاللي صاير
وقّفوا والشعب ثاير
حطو يدينهم بدينه

احتمى الشعب كله .. وعن دروب المعالي

ما تصد الرجال ..
ما رضو بالمذله .. وارخصوا كل غالي ..
في طريق النضال ..
وكل صعبٍ نحله .. وبيرق العز غالي ..

فوق روس الجبال ..
لقيناه .. مجلس يديد ومنتخب
وشفناه .. أوفى بوعده ما چذب ..
رديت للاحرار يا مجلس الامة ..
من عقب كل ماصار شعبك نسى همه ..
شامخ وعن غيره فرق .. اي والله
حاسب وكل اللي سرق .. عرفناه

فجأة رجعنا .. لـ ٢٠٠٩ ..
فجأة رجعنا فجأة رجعنا ..
خطأ اجرائي .. كذبة جريئة ..
خطأ اجرائي فجأة فجأة ..

الله الله يا شمس الفساد ..
وشلون وشلون حرقتي البلاد ..
الله يا كويت الله الله الله ياكويت

شفتي الفساد

(الله لو تدرون شنهو اللي حصل) ..

شاللي حصل ؟

قول لي وشصار طمني شحصل ..
(شنهو بعد ..

يابو المرسوم واحتاس البلد ..
آه يا بلد ..
عزموا يملون ديرتنا نكد ..)
ليش النكد ؟؟
صوت واحد واختلف بس العدد ..

(بس العدد !!)

اي يبا بس العدد بس العدد ..
(تدري شنو ؟؟
يعني الدستور مو عز وسند ..

راح السند ..)

لا تشائم خاف لا تظلم احد ..
انطر بعد ..

شوف هالمرسوم بيحل الامر ..
وبنستقر ..

وبتشوفون الفساد بيندحر ..
واخذوا الخبر ..
كلها چم يوم ولا چم شهر ..
ماهو دهر ..
والبلد يرتاح ويزول الخطر ..
وجهة نظر ..
(لا .. تقولون هذي وجهة نظر ..
والله خطر ..
هذا لو تدرون مرسوم الضرر ..
كله ضرر ..)

عندما استنجد الوطن ..
واشتكى الظلم والوهن ..
قاطع الشعب كلهم ..
حتى لا يدفعوا الثمن ..

الكويت بلادنا الكوبت ..
دستورنا سورها ..
الكويت بلادنا الكويت ..
حراكنا نورها ..
وطني ..
مهما يصير ..
انت المصير ..

انت الكبير بس انت ..
ما يوم فينا خنت ..
آه يا وطن ..

ما راح نرضى تضيع ..
لجلك نبيع الروح ونوقّف جميع ..
بس ما تضيع ..

هذه التدوينة تحتوي علي بدون تعليقات

إضافة رد