من أجمل قصائد ‘ دايم السيف ‘ – المدى |

من أجمل قصائد ‘ دايم السيف ‘

بالكويت أعطانـي الشعـر وعطيـت،، وبالكويـت الشعـر لـه طعـم وحـلاة

بين الحكمة والمدح والغزل والرثاء، تأتي كلمات الشاعر صاحب السمو الملكي الأمير خالد الفيصل مثل ديمة الشعر وغيمة الاحساس، طوع الكلمات وأبدع بالمعاني، وتميز في بحور الشعر والأدب، واخترنا لكم من أشعاره هذه القصائد:

الكويـت

من رياض المجـد لامجـاد الكويـت
مــن ثـبـات العـلـم للعـلـم الـثـبـات
جيـت أصافـح بالتّهانـي كــل بـيـت
للشّهـيـد الـخـلـد والـحــي الـحـيـاه
فوق غيمة شوق مـن أبهـا مشيـت
مـن نـداهـا فــزّت الصّـحـرا نـبـات
سيّرتـنـي نـشـوة الـحـب وسـريـت
للكويـت الّلـي هويـت أكتـب غـنـاة
في غناتي للشّرف صـوت وصيـت
ومـن غناتـي يرفـع الفـارس حـداة
وللكرامـة عـرضـة فــي كــل بـيـت
والـسـجـايـا بالـشـهـامـه نـايـفــات
ياالكويت الّلي على الباغي عصيت
يوم بعض الرّبع ينسـى المكرمـات
يـوم بـان الغـدر قلـنـا لــه خسـيـت
كـــل شـيـطـان رجـمـنـاه بـحـصـاه
دارت الـدنـيـا علـيـهـم واعـتـلـيـت
وانهـزم جيـش النّفـوس الخاينـات
يالفهـد عنـد الوعـد قـلـت ووفـيـت
طاغيات الـرّوس عـادت صاغـرات
مااختلـفـت ولاذخــرت ولاشـكـيـت
شـامـخ مـثـل الـجـبـال الـراسـيـات
دلّــــك الله يالـسـنـافـي واهـتـديــت
والنّصـر مــن عـنـد رب الكايـنـات
مـايـغـط الــحــق رجــــال بـخـيــت
مانـسـيـنـا يـالـكـويـت الـسـابـقـات
يــوم عــز بـدارنـا حـلــو المـبـيـت
إستضـفـتـونـا زمــــان الـنّـايـبــات
لين ابو تركي ظهر من فوق هيـت
واصطفق مـن نجـد لجبـال السّـراه
يرفـع الـقـرآن والسـيـف الصلـيـت
واستـرد الحكـم مـن عقـب الفـوات
ياالصّباح وياالسعودي لى انتخيـت
عـزوتـك عـنّـاز راعــي الـطّـايـلات
ويالاميـر الّلـي علـى العليـا نشيـت
جابـر العـثـرات محـمـود الصـفـات
فـــي بـــلادك كـــل تـكـريـم لـقـيـت
والنشـامـى ماكـتـفـوا بالـواجـبـات
بالكويت أعطانـي الشعـر وعطيـت
وبالكويـت الشعـر لـه طعـم وحـلاة

اسرج حصاني

اسرج حصاني و عطني قوسي وسهمي
ما دام انا في فلاة العمر رحّالي
اصور العمر في شعري وفي رسمي
و عاداتي آسافر الايام بلحالي
اطارد الصيد في روض(ن) عقب وسمي
و اجاوب الورق في غصن الهوا العالي
و اساهر النجم ألين يذوب بي نجمي
و اعانق الشمس اذا شعاعها مالي
و اكتب على الغيمه اللي تستخيل اسمي
و ارسل غرامي مع النسمات للغالي
حبيبي اللي مثل وبل المطر يهمي
على خفوقي سحاب الود همّالي
حبّه بروحي و في نفسي و في دمي
هو بدر ليلي و هو في شمسي ظلالي
انا احمد الله غدا سيد العرب قسمي
من يوم شفته و انا طير السعد فالي
لو شمسها تجهر و لو ليلها يعمي
و لو طالت الدرب ما فكرت في حالي
اسوق رجلي و اقوي بالامل عزمي
و اكسر الشوك حتى الورد يصفى لي

لا تشتكي

لا تشتكـي مـن جـور الايـام للنـاس

وادفن همومك في ثرى الصمت كله

اسـرار عمـرك خلهـا تحـت الانفـاس

لا صــار هــرّاج القـفـا فـاطـنـن لـــه

هذاك يفرح لا لمس جرح الاحساس

و هــذا مـنـاه لا لـقـى فـيــك عـلــه

جـو الربيـع بعـجـة الصـيـف ينـحـاس

لاجت هروج(ن) ما تجي فـي محلـه

داعب هموم الليل لا هب نسنـاس[

وعطها الخبر من قلب خل(ن) لخلّـه

قلّـه حبيبـك مـا وطـى قلبـه الـيـاس

حتـى عذابـك بالـهـوا جـايـز(ن) لــه

تعيش بالوجـدان مـا عـاش هالـراس

لـولاك قلـي وش انـا عايـش(ن) لـه

إن زانـت الايــام يــا شــوق لابــاس

ولاّ صـبـرنــا لــيــن ربـــــك يـحــلّــه

كل ماقفيت

كل ماقفيت ناداني تعال
وكل ماقبلت عزم بالرحيل

الحقيقة غدت مثل الخيال
هو عدوي وهو أوفى خليل

شفت أنا الظلم في بعض الدلال
يجرح القلب لو كانه جميل

يوم أنا أجنبت واعدني شمال
ياهل الود ضيعت الدليل

أشهد أن الهوى مابه عدال
هو خليل وأنا قلبي عليل

كل ماقلتله يابن الحلال
المحبة …عطى وإنت بخيل

التفت يمي وهو عجل وقال
لذة الحب في الشي القليل

عنود الصيد

من خصايص عنود الصيد كثر الطواري

و عادة الظبي يجفل ليتحرك ظلاله

مايصيد الجوازي كود بخص و داري

القنص بالركاده و التسرع جهاله

و لا يعرف الطرد من لا يعرف الصحاري

ماتعرض سموم و لا تعرض شماله

كل درب عليه من المخاليق ساري

للسوالف رجال و للشكاله رجاله

و انت عشقت حياتي يا غزال البراري

اتفاول بوجهك سعد من صرت فاله

انت و الله حبيبي و انت و الله داري

إن نظرة عيوني يم غيرك جماله

ما نقطع سيل حبك بالمعاليق جاري

كن قلبي خلقه لله لحبك سباله

ليتني يا قمرها غار منها نهاري

حيث وصل الموده همسة في لياله

ليت واهج غرامك مثل وجدي و ناري

مير ماظن في دنيا المحبه عداله

سلطان

عند الموادع دمـع عينـي غلبنـي
وطاحت بي الدَّمعه على كفِّ سلطان
أحب يمنى عمَّـي الَّلـي حشمنـي
ومن لامني في حب سلطان غلطـان
شيخٍ بالأخلاق الكريمـه ملكنـي
بالمرجله فـارس وبالرَّحمـه إنسـان
من يزرع المعـروف لابـد يجنـي
ومن يفعل الإحسان يجزى بالإحسان
والَّلـي يريـد المجـد لابـد يبنـي
في قلوب وعقول المخاليـق بنيـان
أفاخر بعمَّي علـى النَّـاس وأثنَّـي
يستاهل البيضا سلايـل كحيـلان
له موقـفٍ عنـد الملمَّـات يثنـي
سلطان موقف والتجارب برهـان
إلى انتهض يكفي وإلـى مـد يغنـي
وإلى تكلَّم كـلِّ شـيٍ معـه لان
وإلى وعد يوفي وإلـى قـال يعنـي
وإلى إرتكى للحمل شالـه بليهـان
بالطَّيب جاوز كل هقـوه وظـنِّ
الله يوفَّقه السَّعد ويـن مـا كـان

رثاء والده

لاهنت ياراس الرجاجيل لاهنت.. لاهان راس فى ثرى العود مدفون
والله ماحطك بالقبر لكن آمنت.. باللي جعل دفن المسلمين مسنون
منزلك ياعز الشرف لو تمكنت.. فوق النجوم اللي تعلت على الكون
سكنت دار المجد ياشيخ وأسكنت.. شعبك معك فى منزل العز ممنون
صنت العهد ياوافى العهد ماخنت.. علمتهم وشلون الاشراف يوفون
كم ظالم عاداك واعفيت واحسنت.. واخلفت ظن اجموع ناس يظنون
شلت الامانه حافظ ماتهاونت.. شفنا بك رجال على النفس يقوون
ياللي طلبه الملك بالحب زينت.. عرشك بتاج قلوب شعب يحبون
لونت تاج الملك ما قد تلونت.. ماغرتك دنياك ماصرت مفتون
بالزهد والمعروف والصبر كونت.. منهاج فيصل منهج اللي يعدلون
تلفتت روس المخاليق وين أنت.. وين العظيم وعود الشوف مطعون
كم خافق وقف عقب ما تكفنت.. وكم ناظر ذوب سواداه محزون
لو شفت حال الناس عقبك تبينت.. مقدار حب الناس للي يودون
مما بقلبي قلت يابوي لاهنت.. ولا انت فوق القول مهما يقولون

هذه التدوينة تحتوي علي بدون تعليقات

إضافة رد